Nakahiagom sa ubay-ubay nga samad pinusilan si Barangay Carmen Kagawad Roland Sherwin “Tawee” Uy lakip ang iyang caretaker nga senior citizen nga si Samuel Pabalan nga sama nga gipamusil kagahapong adlawa sa quarry site sa Zone 1 Barangay Pagatpat ning syudad sa Cagayan de Oro.
Sa imbestigasyon, gibutyag ni Scene of the Crime Operatives Team Leader Regional Crime Laboratory-10 Medico Legal Officer Police Captain Paolo Acosta III nga unom ka samad pinusilan ang nahiagoman ni Kagawad Uy, diin duha ka samad sa tiyan, duha sa ulo ug tig-usa sa braso niini.
Samtang, samad pinusilan sa dughan ug ulo ang nahiagoman sa caretaker nga si Samuel.
Tagsa-tagsa matud pa sa biktima nakahiagom sa fatal gunshot wound nga maoy hinungdan sa ilang hinanaling kamatayon.
Gi-ingong medium range ang pagpusil sa suspek ngadto sa duha ka biktima diin narekober sa crime scene ang 8 ka fired cartridge cases, ug cash nga mukabat sa 35-mil pesos.
Wala nasab nakahigayon ang mga biktima nga modepensa sa ilang kaugalingon ilabi na nga wala sab silay gihuptan nga armas.