BISAN kon anaa sa parehong venue, ang pro ug anti mining group sa ilang gihimong aktibidad kagahapong adlawa, nahimo gihapong hapsay ug malinawon.
Nagpatunga ang kapulisan taliwala sa duha ka grupo, asa sa pro-mining group, gipangunahan sa tribal chieftain, IPMR ug tribal council gikan sa Tampakan asa nagpakiluoy kang South Cotabato Governor Reynaldo Tamayo nga ipadayun ang pagmina.
Samtang ang anti mining group sa pagpanguna sa simbahang Katoliko, mga estudyante ug ubang sector, nga gustong i-veto sa gobernador ang amenda sa Environmental Code nga nagtugot sa open pit mining tungod ang kaugmaon sa mga kabataan ang nabutang sa peligro.
Sa pagkahibalo ni Koronadal City Mayor Eliordo Ogena may napirmahan kini nga duha ka permit sa anti ug pro mining group apan dili ma-recall ang venue sa matag grupo tungod sa kadaghan sa mga gipirmahan niini ug wala usba masayran kung nagdungan ang maong mga grupo sa ilang aktibidad.
Sa kopya sa permit nga gihuptan sa kapulisan, ang pro-mining group sa Rizal park ang ilang mass action samtang sa atubangan sa kapitolyo sa mga gasuporta sa anti mining. Luyo niini, gipasalamatan ni Gov. Tamayo nga matag grupo nakapasibaw sa ilang sentimiento ug mihangyo og panahon nga desisyunan ang isyu sa matinud-anon nga pagdesisyon.