LEGAZPI CITY – Tinawan-doon kan Albay Provincial Agricultures Office (APAO) na wara pa ki nareresibeng report an saindang opisina mapadapit sa pag-atake nin mga peste o insekto sa mga pananom sa probinsya.
Sa intrevista kan Brigada News FM Legazpi kay OIC Assistant Provincial Agriculturist Daryl John Buenconsejo, pigklaro niya na bako man mga peste o insekto an namemerwisyo sa mga pananom kundi mga kino partikularmente sa banwaan kan Polangui.
Segun kay Buenconsejo, pigkakaraon kan mga ini an mga pananom siring kan paroy.
Sinabi man kaini, iba-iba man an epekto asin paagi kan pag-atake nin mga kino saka mga insekto.
An mga peste siring kan brown plant hopper, pigsusupsop an katas kan mga pananom partikularmente an mga rice varieties na minaresulta sa pagigin dry kan mga ini asin nagagadan, alagad digdi sa probinsya, wara pa man ki siring na kaso.
Segun pa saiya, huring nagkaigwa nin report dapit sa kaso nin pag-atake kan brown plant hopper sa probinsya kan taon 2017-2018 sa banwaan kan Oas.
Mientrastanto, abiso ni Buenconsejo sa mga paraoma, pakatanom kan mga paroy, dai muna maggamit nin pesticide sa laog nin 30-40 dias nganing dae magkagaradan an mga good organisms na nakakatabang sa pagpuksa kan mga perwisyo digdi.