BICOL—Pigsierto ni Albay Power and Energy Corporation (APEC) Chief Operations Officer (COO) Apolinario Alvarez na andam sindang hampangon an anuman na imbestigasyon kan Energy Regulation Commission (ERC) sa naging paglangkaw kan saindang power rate kan nakaaging bulan.
Sigun ki Alvarez, wara sindang pigtatago asin makakarahay pa ngani suboot na mag-imbestigar an ERC ngani na maipahiling ninda na pigbase ninda sa rate kan supplier an presyong ipig bill ninda sa mga consumer.
Sa presente, ipinaliwanag ni Alvarez na nasa 25% pang halangkaw an presyo kan kuryente sa Albay huli ta igwa pang porsyon kan power consumption kan probinsya an pigbabakal sa Wholesale Electricity Spot Market (WESM).
Makalihis kaya na maprubahan an Certificate of Exemption (COE) kan July 2, nasa 40 megawatts na an pigbabakal ninda sa San Miguel Energy Corporation (SMEC) sa mas baratong presyo alagad an tada kan kabilugan na konsumo kan Albay, pigkukua pa man giraray ninda sa WESM.
Alagad mas hababa na suboot ngunyan an presyo kan kuryente na naghababa nin nasa P1.80 kumpara sa presyo kan nakaaging bulan kun sain bilog na konsumo kan probinsya pigkukua sa spot market.
Kun dae kaya suboot napaonrahan an COE, posibleng magkawat sa 16 sagkod 17 pesos per kilowatt hour an power rate sa Albay.
Sa ngunyan pig-iinguha na sanang matapos an Competitive Selection process (CSP) para sa magiging bagong power supplier kan APEC.### || SLM
