Attempted Rape accused sa India, pinarusahang maglaba at mamalantsa ng damit ng 2k kababaihan

Libreng laba kasabay na ang pamamalantsa ang ibibigay ng isang 20-anyos na lalaki sa India para sa lahat ng mga kababaihan sa kanilang barangay sa loob ng anim na buwan.

Ito ay bilang kapalit ng kanyang kalayaan matapos na maakusahan sa tangkang panggagahasa. Bago naaresto nitong Abril ay dati nang labandero si Lalan Kumar.

Bukod sa paglalaba ay sagot din nito ang sabon at iba pang kakailanganin sa kanyang free laundry services para sa nasa 2,000 babae sa Majhor village sa Bihar state.

Ayon sa pinuno ng village na si Nasima Khatoon, ikinatuwa ng lahat ng mga babae sa kanilang lugar ang naging desisyon ng korte sa naging parusa kay Kumar.

Anya, makasaysayan ang naging desisyon ng korte at makakatulong din ito upang maitaugyod ang respeto sa kababaihan at maprotektahan ang kanilang dignidad.

Ayon naman kay Anjum Perween, maganda ang mensahe sa pamayanan ng kakaibang parusang ito lalo na pagdating sa mga usaping may kinalaman sa kababaihan. || Shiela Madrigalejos