LEGAZPI CITY – Gadan an babaeng backride kan motorsiklo sa sarong banggaan nin motor asin awto alas 8:25 kasubanggi sa Access Road, Brgy. Gabawan, banwaan kan Daraga, Albay, mantang lugadan man an driver kaini asin an sarong menor de edad na aki.
Basado sa report, pararehong residente kan Brgy. Baligang, banwaan kan Camalig an mga biktima na lunad kan Euro motorcycle, mantang residente man kan Brgy. San Isidro, Bulan, Sorsogon an 54 anyos na driver kan Toyota Hilux.
Sa inisyal na imbestigasyon kan mga otoridad, paduman sa magkasuway na direksyon an mga lunadan. Paduman sa Legazpi an awto, mantang pa-Tabon-tabon, Daraga an motorsiklo.
Kan makaantos na sa lugar kan aksidente, biglang luminaog sa ibong na lane an motorsiklo asin aksidenteng buminangga sa inutan na porsyon kan awto.
Huli kaini, nagsapar nin mga tama sa manlain-laing parte kan lawas an mga nakalunad sa motor asin tulos na dinalagan sa BRHMC alagad dead on arrival an nasambit na backride.