Maabung posibilidad ro ginatan-aw it Balete Municipal Police Station kung sin o ro matuod nga nagabuyot sa facebook account it ginasugid nga nag post it bomb threat nga ginka-alarma it publiko.
Sa interview it Brigada News FM Kalibo kay Police Major Bryan Alamo, hepe it Balete MPS, gin-refer nanda ro nasambit nga insidente sa Regional Anti Cyber Crime Unit o RACCU.
Suno kay PMaj. Alamo, matapos nanda nga mabatun ro impormasyon kaangot sa post it sangka indibidwal nga magatanum raya it bomba sa Aklan Provincial Capitol ag LGU-Balete, hay insigida sanda nga nagpatigayun it imbestigasyun.
Nasayuran segun nanda nga ro subject person hay sangka miyembro it Person With Disability (PWD) ag particular nga gintumod nga may learning disability.
Bangud sa kondisyon it ginasugid nga suspek, gin-refer raya sa medical examination ag nakataeana nga ipaidaeum sa psychiatric examination.
Samtang, ginakonsidera man ni PMaj. Alamo nga posibleng may ibang tawong nagagamit sa account it subject person ag posibleng biktima man raya it identity theft.
Uman nga ginpadumdom it hepe nga bukon it manami ro makarondaya nga “joke” bangud sangka pag eabag raya sa Presidential Decree (P.D.) No. 1727, o “Anti-Bomb Joke Law. // ANN DESLENE SALAZAR