Narekober sang mga katapo 12th Infantry (LICK`EM) Battalion, 82IB, 2nd Capiz PMFC kag 602nd Coy RMFB6 ang bangkay sang isa ka miyembro sang New People’s Army kag ginaalegar asset sang militar sa Sitio Nolwan, Barangay Siya, Tapaz, Capiz.
Ginkilala ang nasapwan nga bangkay kay Ruben Diaz, 28-anyos, residente sang Sitio Cumbong, Barangay Masaroy, Calinog, Iloilo kag nagaserbi sa Igabon platoon sa idalom sang Central Front sang KR-Panay nga naga-operate sa kabukiran sang Calinog, Iloilo kag Tapaz.
Suno sa amay sang biktima, 15-anyos pa lamang ang iya anak sang gin-recruit na sang nasambit nga rebelde nga grupo kag nangin full-fledged NPA member.
Sandig sa 12th Infantry Battalion sang Philippine Army, ang kamatayon ni Diaz ang nagapamatuod nga nagalapas ang mga rebelde sa tawhanon nga kinamatarong, nagakadapat lang nga papason ang mga ini kag mapanabat ang may kahimuan sang krimen. | Judy Ann Juare