Barangay Bawing may special session gumikan sa bag-ong upat ka kaso sa COVID-19

NAGPAHIGAYON og special session ang mga opisyales sa Barangay Bawing aron makahimo og lakang sa upat ka kaso sa COVID -19 sa usa ka purok ug ang pagpangandam sa umaabot nga Barangayan sa Mayo 24-28 sa kasamtangan nga tuig.

Sa kumpermasyon ni Kagawad Harold Tare sumala niini nga nabalaka sila sa bag-ong kaso sa COVID-19 sa usa sa ilang purok, nagsugod sa amahan sa pamilya unya nagpositibo usab ang mga anak mao nga upat ka bag-ong kaso ang natala sa ilang lugar.

Wala usab daw nasuta kung asa gayod gikan ang virus nga nakuha sa amahan sa usa ka panimalay,ang usa sa suspetsa ang pag-adto niini sa Barangay Calumpang nga usa sa taas usab og kaso sa COVID.

Ang plano sa taga Barangay Bawing nga maghimo lang ug usa ka entrance ug exit point sa matag purok aron masayran ang nagagawas sulod sa ilang barangay.

Ang lain nilang gihisgutan kung paunsa ang Barangayan kay bawal man ang pagtapok sa mga tawo subay sa bag-ong Executive Order.

Masayran ang mga kabag-ohan human sa ilang special session ug sa ma aprubahan nga resolusyon sa konseho sa barangay. (Ever Diazon)