LEGAZPI CITY – Hasta sa ngunyan, wara pa nin lead o impormasyon an bilog na konseho de barangay kan Anislag, Daraga, Albay manungod sa ina kan nakuang buhay na umboy o kun siisay man an nagtapok kaini sa maawot na lugar kan Disyembre 24.
Sa intrevista kan Brigada News FM Legazpi kay Kagawad Chelyn Beato, sinabi niya na apat na barangay health workers an nakakasakop sa Ansilag alagad wara ki naka-record sa sainda na pregnant woman na Disyembre an due.
Padagos man an saindang pakikipagtabangan sa mga otoridad, siring man, padagos man an pagkondusir nin imbestigasyon nganing ma-identipikar an ina kan umboy o an responsible sa insidente.
Mientrastanto, presenteng nasa Bicol Regional Hospital and Medical Center (BRHMC) an umboy asin tinatawan na nin maninigong medikal na tratamento.
Segun kay Beato, kinakaipuhan su boot ining ma-admit huli ta nagsapar nin mga gasgas sa pandok an umboy dahilan sa mga awot.
Wara kaya nin anuman na sulot an umboy kan madiskubre, nakapurupot pa sa tulak an pusod asin haros na-drain naman sa kakahibi nin pirang oras.
Magigirumduman, bandang alas 7 y media kan disperas kan Pasko, nadiskubre kan aki kan purok chairwoman an umboy sa nasambit na lugar kan may madangog ining hibi.
Alagad segun kay Beato, antes ini, bandang alas 3 nin maumagahon kan aldaw na ito, nagbabaratok an mga ayam harani sa lugar kun sain nadiskubre an umboy.