Gin-implemetar na sang Philippine Health Insurance Corporation (PhilHealth) ang 30% nga pagtaas sang coverage rate benefit kadungan sa pagsaulog sang ika-29 nga annibersaryo sang nasambit nga ahensya sadtong Pebrero 14, 2024.
Ini ang ginkumpirma ni Mary Jane Amigo, tagpamaba sang PhilHealth – Capiz sang ma-interview sang Brigada News FM Roxas.
Suno kay Amigo, tinutuyo sang nasambit nga adjustment nga mapahagan-hagan ang balayran sa ospital sang mga miyembro ukon pasyente.
Nahibaluan nga sang tuig 2013 pa ginpasar ang case rates para sa burdensome diseases apang ini ang wala lang na-update sa sulod sang 11-katuig.
Ginpahayag sini, nga may mga benefits package ang nagtaas sa masobra 200% ilabi na kun ‘most burdensome diseases’ kag ‘commonly availed cases’ kasubong sang acute stroke kag high risk pneumonia.
Gin-adjust naman sa P76,000 gikan sa P28,000 ang makuha sang may balatian nga ischemic stroke;
P80,000 benefits gikan sa 38,000 ang makuha sang may yara sang hemorrhagic conditions kag P90,100 ang mahimo ma-avail sang mga pasyente nga may high risk pneumonia, nga anay yara lamang sa P32,000.
Ginklaro man sini nga nakadependi man sa cases ang pag-avail sang rates benefit bangud nagakonsulta pa sila sa mga medical expert kun paano ginabulong ang isa ka balatian kag diri man ginabase ang pagpasaka sang mga benepisyo nga ginahatag sa tawo ukon pasyente. | Judy Ann Juare