LEGAZPI CITY – Mas pinakusog pa ngunyan kan Bureau of Fire Protection (BFP) Camalig an pagsasagibo nin inspeksyon sa mga tindahan nin paputok sa banwaan orog na ngunyan na pirang aldaw na sana antes an Bagong Taon.
Kasarabay sa saindang pig-inspeksyon an mga nagpapabarakal nin fireworks, firecrackers asin mga pyrotechnic materials sa saindang nasasakupan nganing masiyerto kun nag-uutob an mga ini asin kun igwa sindang mga tamang clearances asin mga permit.
Sa paaging ini, saindang pigpatanidan an mga paratinda na magin marikmat asin pirming mag-ingat nin huli pwedesir magkawsa nin karatan sa palibot o aksidente an saindang mga pigtitinda.
Mientrastanto, padagos an saindang pigsasagibong firetruck visibility asin an pagdistribwer nin fire safety pamplets sa irarom kan Oplan Iwas Paputok 2023.