GIPAKUSGAN sa otoridad sa GenSan ang information dissemination ug education campaign batok ‘bombing’. Dungan sa pagkadiskubre ug pag-defused sa gidudahang eksplusibo sa duol sa main gate sa Husky Bus terminal sa Cotabato City, nakalabay’ng adlaw.
Matud ni Raymond Ledesma, Bulaong terminal administrator kauban ang kapulisan sa GenSan, nanghatag sila og safety tips sa mga pasahero.
Gihatagan usab nila og video materials ang mga unit sa bus asa ginapakita ang mga safety tips aron makalikay sa pagpamomba. Gawas niini, midugang sa kapulisan ug Civil Security Unit (CSU) nga nagbantay og seguridad sa terminal ang mga sakop sa Joint Task Force GenSan (JTFG). Aron masiguro nga dili makalusot subli ang eksplusibo sa terminal sa siyudad, dugang ni Ledesma.
Nanawagan usab kini sa mga pasahero nga dili magbilin og mga butang sa terminal aron malikayan ang panic sa mga unattended baggage. Kahibaloan nga nakalabay’ng bulan, gipabusikad sa otoridad ang gituohang eksplusibo nga nabilin sa usa ka unit sa bus sa terminal. Pipila usab ka unattended baggage ang nakamugna og kahadlok sa mga residente sa siyudad. I Richel Gubalani