Nagpanindugan ang Capiz Bankers nga ginabaton nila ang National ukon PhilSys ID sang ila kliyente nga ginagamit bilang valid ID para sa transaksyon, ini matapos nagpanawagan si Senator Win Gatchalian kag nagpaandam nga magamulta ang banko sang 500K sa tion nga madakpan ini nga wala nagabaton sang nasambit nga identification card.
Sa interview sang Brigada News FM kay Mr. Alberto Biclar, Presidente sang Capiz Bankers, ginpahayag sini nga nakabaton na sila sang memorandum nagikan sa Bangko Sentral ng Pilipinas kag Philippine Statistic Authority natuhoy sa pagbaton sang PhilSys ID bilang valid id sang mga kliyente ukon costumer sa transaksyon.
Apang kinahanglan sa gihapon nga i-verify ini sa PSA agud mahibaluan nga ang card holder ang matuod nga nagagamit sang amo nga ID bangud kun aton manutaran ang PhilSys ID ang wala sang perma sa likod kag QRcode lang ang makit-an dire kag picture sa una.
Kun matandaan, ginpermahan ni anay President Rodrigo Duterte ang layi nga Republic Act No. 11055 ukon An Act Establishing The Philippine Identification System sadtong August 6, 2018.
Dugang pa ni Biclar, ang implementing rules and guidelines sang layi amo ang i-authenticate sa website sang PhilSys agud mahibaluan kun verified ukon valid ang amo nga ID rason nga nagakadugayan ang pag-transact sang kliyente kun ini ang ginagamit.
Ginsiguro man ni Biclar, nga ang tanan nga banko sa Capiz ang nagabaton gid sang PhilSys ID. | Judy Ann Juare