Hugot nga ginapatuman sang Capiz National High School ang “No Car Pass, No Entry” policy.
Ini ang ginkumpirma ni Charlie D. Begas, School Principal IV sang CNHS sang ma-interview sang Brigada News FM Roxas City.
Suno kay Begas, anay na nga ginapatuman ang nasambit nga polisiya sadtong kasagsagan sang pandemya apang sang nagdugay nabalewala na.
Rason nga ila ini ginbalik sa katuyuan man nga mamonitor ang nagaguwa sulod nga mga salakyan sa eskwelahan para sa safety sang mga estudyante, manunudlo kag iban pa nga mga personnel sang CNHS.
Nahibaluan nga madamo sang mga outsider ang nagasulod sa CNHS kag nagatuga sang gamo.
Ginpahayag ni Begas, nga indi na nila paghulaton nga may matabo pa nga malain antes ipatuman ang amo nga tikang bangud ang ila prayoridad ang kaluwasan sang tanan.
Antes ginpaguwa ang memorandum sa nasambit nga polisiya, ginkasugtan na ini sang Parents-Teachers Association.
Nagabalor sang P50 ang car pass nga pagagawaron sang mga ginikanan/guardians nga may salakyan ukon anuman nga sahi sang serbis para sa ila mga kabataan kag ini ang ila mahimo magamit sa sulod sang isa ka tuig.
Sa paggawad sang car pass kinahanglan lamang nga magpresentar sang driver’s license kag rehistro sang behikulo.
Ginklaro ni Begas, nga indi obligado ang mga manunudlo nga maggawad sang car pass, amo man ang mga guest, nagabusong, senior citizen kag person with disabilities kun sila ang nagapadul-ong sa salakyan kag tricycle apang dapat kinahanglan gid sang proper verification. | Judy Ann Juare