Dead on arrival sa Bailan District Hospital ang isa ka caretaker sang fish pond matapos malumos sa Sitio Jabucayan, Brgy. Rizal, Pontevedra, Capiz takna alas 2:40 kaina sang kaaganhon, Disyembre 13.
Ginkilala ang biktima kay Nicolas Mamburam, 40-anyos, may live-in partner kag residente man sang nasambit nga lugar.
Sandig sa imbestigasyon sang Pontevedra Municipal Police Station, samtang yara sa perta sang punong ang biktima agud magpasulod sang tubig, nadanlog ini rason nga naanod sang mabaskog nga current sang tubig.
Nahibaluan nga kaupod sang biktima ang iya anak nga nagpadulong sa punong.
Bangud sini, madasig nga nagpauli ang bata agud ipahibalo sa iya iloy ang natabo.
Nagresponde sa lugar ang katapo sang Pontevedra Emergency response team kag ginpadangat pa sa ospital ang biktima apang ini ang wala na matabangan pa.
Sa karon, yara na ang bangkay sang biktima sa isa ka punerarya sa nasambit nga banwa. | Judy Ann Juare