Arestado sang kapulisan ang ginakabig nga top 4 most wanted person sa provincial level kag top 7 sa city level matapos ginserbihan sang mandamiento de aresto takna alas-11:20, Martes nga adlaw sa Barangay Lawaan, Roxas City.
Ginkilala ang nadakpan kay alyas ‘Nonoy’, 22-anyos, grade 9 student kag residente sang Barangay San Jose sa nasambit nga siyudad.
Ang warrant of arrest sa kaso nga RA 10883 ukon ang ‘New Anti-Carnapping Act of 2016’ ang pirmado kag ginpapanaog ni Hon. Lorencito Belo Diaz, Presiding Judge, Regional Trial Court, 6th Judicial Region, Branch 17, Roxas City napetsahan Nobyembre 30, 2023.
Naglab-ot naman sa P300,000 ang piyansa nga ginrekomendar sang korte para sa temporaryo sini nga kahilwayan.
Sa karon, nagapabilin ang akusado sa kustodiya sang Roxas City PNP para sa nagakaigo nga disposisyon.| KMD Gicalde