Gipahamtangan og 6 ka buwan nga preventive suspension si Cebu City Mayor Michael Rama sa buhatan sa Office of the Ombudsman ingon man ang 7 laing mga empleyado sa Kagamhanan sa Dakbayan sa Sugbo karung adlawa, Miyerkules, Mayo 8, 2024 tungod sa giingong wala pagsweldo sa pipila ka mga empleyado sa Cebu City Hall.
Sa 10 ka pahina nga resolution ni Ombudsman Samuel Martires lakip sa gipahamtangan og preventive suspension mao ang laing 7 ka mga empleyado sa Cebu City Hall nga mao silang Atty. Collin Rosell (Cebu City Administrator), Maria Theresa Rossell (OIC sa Office of the City Assessor) Francis May Jacaban (Legal Officer), Angelieque Cabugao, (Designated Assistant Department Head), Jay-Ar Pescante (Designated Administrative Division Head), Lester Joey Beniga (Designated Assessment and Records Management) ug Nelyn Sanrojo (Designated Computer Division Head).
Nasuta sa Office of the Ombudsman nga pinaagi sa usa ka resolusyon nga giluwatan ni Ombudsman Martires, nakakita sila og igong basehan aron mapugngan si Rama tungod sa reklamo sa grave misconduct ug conduct unbecoming of a public officer, conduct prejudicial to the best interest ug uban pa.
Ang desisyon nagsumikad sa kaso nga naglambigit sa pag-reassign sa pipila ka mga kawani sa City Hall nga niresulta sa kapakyas sa kagamhanan sa dakbayan sa pagbayad kanila sa ilang suholan sulod sa 10 ka buwan.
Nagdumili hinuon paghatag og komento si Mayor Rama kalabot niining maong butang sa pagkutlo niining balita wala pa madawat ni Mayor Rama ang kopya sa suspension order gikan sa Ombudsmans.
| Henry Luke Vestil III