LEGAZPI CITY – Lugadan an sarong construction worker makalihis na pukpukon an payo kaini kan duwang dai pa nabibistong mga lalaki sa Old Albay District, Legazpi City.
Segun kay PEMS Joseph Herbert Aringo, Investigation PNCO kan Legazpi City Police Station, antes mangyari an insidente, hale an biktimang si Alwin Letran, 29 anyos, asin residente kan Purok 5, Brgy. Bagumbayan, banwaan kan Daraga, sa beer plaza kan Magayon Festival kaiba an saiyang mga barkada, kun sain posible su boot na nagpuon ini sa dai pagkakasinabutan.
Makalihis an pirang oras, kan maghale an grupo kan biktima lunad kan duwang motorsiklo, sinundan ini kan mga suspek asin duman na nagpuon an suruntukan hasta makalaog an mga ini sa sarong fast food chain.
Sa ngunyan, nagpapadagos an imbestigasyon kan mga otoridad dapit sa insidente nganing mabisto asin masangatan nin maninigong kaso an mga suspek.