LEGAZPI CITY – Timbog an sarong lalaking construction worker na pusher nin iligal na droga sa buy-bust operation na sinagibo kan mga otoridad sa Purok 2, Brgy. San Isidro, banwaan kan Sto. Domingo, Albay.
Binisto ining si alyas “Tonton”, 28 anyos, soltero asin residente kan Purok 2, Brgy. Kidaco, banwaan kan Daraga. Inarestar ini makalihis na aktwal na makabakal an poseur buyer nin selyadong sachet nin pinagtutubudang shabu sa kantidad na PHP500.
Sa sinagibo man na body search kan mga otoridad sa suspek, narekober pa an sarong pidasong sachet nin poko mas omenos 0.16 grams nin kaparehong item na nagkakantidad ki PHP1,080, buy-bust money asin iba pang non-drug items.
Nahahampang ini sa kasong pagbalgar sa Republic Act No. 9165 o an Comprehensive Dangerous Drugs Act of 2002 asin nasa kustodiya na kan Sto. Domingo MPS para sa magkakanigong disposisyon.