BICOL—Kinargo na kan lokal na gobyerno kan syudad nin Legazpi an pag akomodar sa mga COVID-19 patients na may mild sagkod moderate na kondisyon.
Ini ngani na mabawasan an mga pasyenteng pigdadara sa Bicol Regional Training and Teaching Hospital (BRTTH) makalihis na mag-agrangay na napapano na.
Enot kaini, ipigrekomendar kan Department of Health Bicol na itao na sa mga LGU an pag manihar sa mga mild cases urog na ta bako sana an BRTTH an nakakaeksperyensya ngunyan nin pagkapano kundi maging an iba pang mga ospital na may COVID and isolation wards siring kan Bicol Medical Center.
Sigun ki alkalde Noel Rosal, bubuksan ninda an Legazpi City Hospital para sa mga COVID patients na may mild and moderate conditions kun kaya paramientras ining dae maakseptar nin mga non-COVID patients.
Dae man suboot nin dapat ikahandal an mga dati kaining pasyente huli ta irerefer sinda sa mga pribadong ospital na warang balance billing asin mailalaog sa Philhealth sa Masa.
Kasabay kaini, liwat na nagpagirumdom an alkalde sa mga Legazpeño na maging dispilinado asin padagos sunudon an mga health protocols ngani malikayan an padagos na paglakop kan COVID-19.
An syudad nin Legazpi nakakaeksperyensya nin padagos na paglangkaw sa kaso nin COVID-19 makalihis an sunod sunod na aldaw na pagrehistro nin dakol na kaso.###