LEGAZPI CITY – Pig-aadalan na kan Department of Agriculture (DA) Bicol an dapit sa saindang pagsapubliko kan drone sprayer.
Segun kay Regional RSBSA Focal Person, Bjorn Borris De los Santos, an sprayer kaya igwang kakayanang magbariwas ki pesticide asin iba pang kemikal para sa mga omahan na dai na kaipuhan nin manual o mismong paraoma na maglibot-libot.
Alagad, antes ini opisyal na magamit sa mga omahan, dapat makapasar muna ini sa health and safety standard huli ta pwedesir ini makaapektar sa salud kan mga residente sa palibot kan gagamitan kaini.
Mientrastanto, an drone sprayer igwang kapasidad na 10 litro asin kayang makalayog sa laog nin 12 minutos asin malibot an nasa 3-5 ektarya nin omahan.
Kasabay pa sa saindang mga piggagamit na dara kan teknolohiya iyo an mapping drone asin 3D printer.