Dabawenyos gipaamping sa mga pagbaha ug pagdahili sa yuta

Hugot ng nanawagan ang City Disaster Risk Reduction and Management Office (CDRRMO) sa mag residente nga nagpuyo duol sa mga kasapaan ug kadtong mga lugar nga nahimutang sa low-lying ug flood prone areas nga mangandam sa epekto nga dala sa Bagyong Dante.

Kasarangan ngadto na sa kusog nga pag-ulan ang dala sa Bagyo sa dakbayan sa Davao busa padayong nakaalerto ang nagkadaiyang Barangay Disaster Risk Reduction and Management Council alang sa pagahimoong mga pre-emptive ug rescue operation.

Gibantayan karon ang Talomo River, Lipadas River, Bunawan ug Lasang River ug ubang kasapaan sa syudad ilabo nang sa niaging Domingo sa gabie anaa sa kapin gatos ka pamilya ang gihikling human gibaha ang ilang panimalay nga niabot pa sa halos taga dughan ang tubig baha.

Sa report sa CDRRMO, 65 ka pamilya ang gibakwit gikan sa Bulusan ug Taal  sa Bangkal Talomo; 12 ka pamilya gikan sa Barangay Bunawan, Bunawan District; tulo ka pamilya sa Barangay Mintal, Tugbok District; ug 10 pamilya gikan sa Barangay Bago Aplaya, Talomo District samtang ang uban mipasilong sa ilang mga kabanay.

Sa pikas nakasinati usab og pagdahili sa yuta didto sa Tagum Road, Barangay Tuburan sa Mawab kagahapon sa buntag.

Kahibaluang severe weather bulletin sa PAGASA bandang 5:00 sa hapon, nabantayan ang sentro sa bagyo sa gilay-ong 375 kilometers sa Sidlakan sa Surigao City, Surigao del Norte ug napabilin sa Tropical Storm Dante ang kusog samtang nagalihok pa-Kanluran sa Philippine Sea.

Hinay hangtud kasarangan nga moabot pa sa kusog nag pag-aulan ang posibleng masinati sa Catanduanes, Albay, Sorsogon, Masbate, Cebu, Bohol, Camiguin, Misamis Oriental, Bukidnon, SOCCSKSARGEN, ug nahibiling bahin sa Caraga ug Davao Region.

Leave a Reply

Your email address will not be published. Required fields are marked *