Ginkulong segun si Mrs. Alma Tabiolo sa Doha Quatar it pilang adlaw kat magpamalibad raya nga magtrabaho sa sangka Egyptian employer.
Bangud sa nagutom eon segun imaw hay nagwala raya ngani tinawagan ro anang agency para boe-on raya.
Naghalin segun imaw it Doha ku Pebrero 14 ag nag abot imaw sa Pilipinas it Pebrero 15 it agahun ag owa man lang it gintao kana nga anumang bulig ro anang ahensya.
Halin sa NAIA hay ginbaktas eang nana hasta sa Baclaran ag nakakita imaw it Gcash ngani nakatawag raya sa anang asawa para magpangayo it pamasahe pauli it Aklan.
Inutang pa segun it anang asawa ro pamasahe nga ginpadaea kana pero kueang segun gihapon ro anang kwarta nga pamasahe sa barko.
Mayad eon lang ag may nagbulig kana ngani nakabakae imaw it tiket ag nakauli sa Aklan. Nagapati segun imaw nga kung nagapangamuyo hay pagabuligan gid it Diyos.
Kaya segun imaw nag abroad hay bangud an-um ro andang mga unga nga gusto nana nga mataw-an it manami nga kabuhi.
Ro gusto eamang ni Mrs. Tabiolo nga makapagpa medikal imaw, bangud halin nga nag abot imaw sa Aklan hay naga-bleeding eon imaw nga basi posibleng bangud sa na-eksperiensyahan nana ro gutom ag pagpanakit kana sa Doha Quatar. // ANN DESLENE SALAZAR