LEGAZPI CITY – Sarong delivery rider an hinabunan nin duwang dai nabistong mga suspek sa Sitio Putot, Brgy. Nablangbulod, banwaan kan Pio Duran, Albay.
An biktima, sarong 25 anyos na J&T rider na residente kan Brgy. 4 kan nasambit na banwaan.
Sa report kan mga otoridad, alas sais nin banggi nangyari an panghahabon, kun sain makalihis na kolektaron kan biktima an bayad para sa tulong parcels sa Brgy. Alabangpuro, hinarang siya kan mga suspek.
Saro sa mga ini, nakasulot nin itom na jacket, dark blue na pantalon, itom na face mask, itom na kalo, asin armado nin pistol na siyang nagtangay nin sling bag kan biktima na may laog na PHP30,000.
An kairiba man kaini, nakaitom asin puting sapatos, dark blue na pantalon, itom na jacket, bonnet asin facemask.
Sa ngunyan, padagos an imbestigasyon kan mga otoridad para sa ikakadakop kan mga suspek.