Niunay sa pagpanulis sa gitrabahoan nga parcel company ang usa ka delivery rider nga giingong hapit na matangtang sa maong gitrabahoan didto sa Sitio Engineering Brgy. Basak San Nicolas, dakbayan sa Sugbo.
Matud pa , pasado alas 8 sa gabie sa Mayo 5, nipahigayon og inventory sa parcel room sa duol sa gate ang usa ka admin staff, pasado alas 9, kalit nga misulod sa parcel room ang usa ka lalaki nga nagsul-ob og itom nga helmet, nagtaptap og bath towel, gray nga hood jacket ug itom nga karsones ug nagdala’g pistola nga armas dayon mideklarar og hold-up.
Gikuha sa suspek ang kwarta nga gibanabanang mobalor sa P200,000.00 nga gibutang sa lamesa sa parcel room.
Wala pa makontento, ang suspek og nihangyo sa duha ka admin staff nga mopadayon sa COD room diin gibutang ang volt.
Sa pagsulod sa COD room, gi-adjust sa suspek ang CCTV aron dili siya madakpan o mailhan. Human niini, gigapos sa suspek ang mga kamot ug tiil sa lalaki nga admin staff (Joel Guanzon) ug nihangyo sa laing nga admin staff (Jiesabel A Mier) nga ablihan ang volt ug malampusong gikuha ang kuwarta nga gibanabanang mokabat sa P261,121.00.
Dali nga nisibat ang suspek human sa insidente gamit ang iyang motorsiklo.
Atol sa pagpahigayon sa follow up investigation, base sa mga asoy sa mga testigo ug mga ebidensiya nga nahipos nahibaw-an nga usa ka Alyas Fernan ang suspek , 42 anyos, minyo, lumad nga taga Cotabato City ug kasamtangang nagpuyo sa Bayabas Ext. Ganciang St., Brgy Punta, dakbayan sa Sugbo. Naysran usab nga ang maong suspek hapit na matangtang sa kompanya.
Nakuha ni alyas Fernan ang kinatibuk-ang kantidad nga kapin Php 465,460.14
Kasamtangan kini nga gibalhog sa Mambaling Police Station alang sa tukmang disposisyon sa kaso. | Sheila Mae Altubar