BICOL – Mas pinakusog ngunyan kan Department of Education o Deped-Bicol an saindang pagpapautob kan health security asin pagsunod sa minimum health standards protocol kontra COVID 19.
Base ini sa advisory na ipinaluwas kan Public Affairs Unit kan DepEd-Bicol kun saen mapautob nin dugang na pag iingat kontra virus asin bilang pagsunod na man sa mga probisyong nakapalaman sa joint circular kan Deped-DOH katakod kan implementasyon kan limited face to face learning.
Parte kan memorandum an pag-require sa gabos na authorized visitors an kinakaipuhan na makapag schedule nin appointment sa mga school heads para malimitaran an mga tawo sa school premises siring man an mahigpit na pagsunod sa mga health protocols asin screening, pag presentar nin ID asin pagsimbag sa form.
Katakod kaini , gabos na media partners an kinakaipuhan na maghagad nin appointment sa Schools Division Superintendent asin School Heads o Principal antes makapagsagibo nin coverage o interview sa mga Deped personnel na mangungenot sa implementasyon kan limited face to face classes sa mga tinugutan na eskwelahan.
Mas maray soboot kun igwang koordinasyon sa mga Division Information Officer asin School Information Coordinators tanganing tulos na maabisuhan kun engkaso igwang mga bagong updates o nagkapirang pagbabago.
Mantang nagluwas man an Deped Central Office nin mga giya na dapat sunudon kan mga estudyante ,paratukdo asin mga magurang/tagapag ataman para sa maray asin salbadong pagpapautob kan face-to-face classes sa maabot na November kinse ,aldaw nin Lunes.