Dikya na may mahahabang sting mas delikado- BFAR

CAMARINES NORTE- Pinag-i-ingat ng Bureau of Fisheries and Aquatic Resources (BFAR) ang publiko sa paliligo sa dagat dahil sa naglipanang dikya o jellyfish na maaaring maging dahilan pa ng pagkamatay.

Sa panayam ng Brigada News FM Daet sinabi ni Provincial Fishery Officer Rolando Tiam na ang pinakamainam pa ring pag- iingat sa ngayon ay ang pag iwas sa palililigo sa dagat lalo’t may umiiral din namang restriction ang gobyerno dahil pa rin sa COVID- 19 pandemic.

Pero kung hindi umano maiiwasan ay kinakailangan ang ibayong pag- iingat at maligo lamang sa mga resort na mayroong net kung saan hindi makakapasok ang dikya,

Ayon kay Tiam, pinaka delikado sa mga species ng dikya ay ang mayroong mahahabang sting dahil mataas umano ang toxic level na inilalabas nito.

“Ang ingatan lang po natin ay yung mahahaba ang sting at yun po ang nagtataglay ng toxic na itatama doon sa kaniyang magiging biktima”, ani Tiam

“Sa ngayon po talagang panahon ngayon ng mga jellyfish o salabay na yan,  siguro number one na prevention natin since na tayo ay nasa mga restriction ng ating gobyerno, siguro wag na lang lumabas, huwag na lang maligo sa dagat kasi andiyan nga yung threat ng salabay  lalo na kung ma encounter mo yung highly toxic na specie ng salabay.”

Bilang paunang lunas ay maaari umanong maglagay ng mainit na towel sa parte ng katawan na apektado at dalhin sa pinakamalapit na ospital.

Dagdag pa ni Tiam na tatagal ang season ng mga jellyfish partikular dito sa lalawigan ng Camarines Norte hanggang Agosto.

Ayon naman sa mga marine biologists ang pinakadelikadong uri ng dikya ay ang “cuatro cantos” o box jellyfish.

Maaari itong magpakawala ng selulang “nematocysts” na nagtataglay ng lasong maaaring makaparalisa sa puso at nervous system ng biktima.

Ipinapayo na kapag tinamaan ng sting o galamay ng cuatro cantos ay agad umahon mula sa tubig dahil posibleng may pakalat-kalat pa itong lason.

Mabisa umanong antiseptic ang suka o pang-alis ng mikrobyo sa nasalabay na bahagi ng katawan.