Gipaklaro karon sa Department of Health-XI nga wala nalakip sa variants of concern ang nadetect nga variants nga unang gitoohang P.1 o Brazilian variant sa COVID-19 sa Davao Region gikan sa mga samples sa Davao Oriental.
Base sa suwat pagpaklaro ni DOH-XI Regional Director Dr. Annabelle Yumang ngadto sa Davao Oriental, gitino nga ang nadetek nga variant wala gibutang sa variants of concern gumikan sa kakulang pa sa mga datus kung kini angay ba himuan og mas hugot nga pagtagad alang sa kaluwasan sa panglawas.
Tungod niini gimanduan ang Provincial Task Force-COVID-19 lakip ang Mati Incident Management Team nga klaruhon ang nahaunang gipagawas nga pahayag aron dili makahatag og kalibog ingon man kabalaka sa publiko.
Sumala kang Provincial Task Force-COVID-19 Action Officer Dr. Reden Bersaldo, base sa data sa DOH ang mga variants of concern mao ang musunod: United Kingdom o Alpha variant (B.1.1.7), South Africa o Beta variant (B.1.351), Brazilian o Gamma variant (P.1), ug India o Delta variant (B.1.617.2), samtang ang variant of interest mao ang Theta P.3 nga tanan walay namonitor nga presensya niini sa Davao Oriental.
Gitataw ni Bersaldo nga magpabilin gihapon ang mga pahimangno sa gobyerno sa paghatag og proteksyon sa publiko bisan paman sa unsang matang sa variant sa COVID-19 ang madiskubre.
Una nang gireport sa Mati Incident Management Team sa niaging Lunes nga anaa sa siyam ka samples ang nadetek nga dunay lineage sa B.1.1.28 variant sa SARS-CoV-2 base sa gihimong genomic sequencing sa Philippine Genome Center sa milabayng Hunyo 10, 2021. BNFM-DAVAO
