BICOL – PIG INGGANYAR ngunyan kan Department of Labor and Employment o DOLE-Bicol an publiko na makisumaro sa isasagibong jobs asin business fair sa maabot na Hunyo a-dose, sa mismong aldaw nin katalingkasan.
Segun sa DOLE-Bicol, dahil pa man giraray sa huma kan pandemya, magiging virtual an pagsasagibo nin 2021 Kalayaan: Online Trabaho, Negosyo, Kabuhayan (TNK) Job & Business Fair asin One-Stop-Shop Services na maarangkada puon Hunyo onse hasta trese ngunyan na taon.
Obheto soboot kan pinahiwas na TNK initiative kan DOLE an mas dakul na employment opportunuties para sa Bicolano asin magiyahan an mga aspiring entrepreneurs o nagmamawot na magkaigwa nin sadiring hanapbuhay o negosyo.
Sa siring na paagi soboot mas mapaparikas an paghiro kan human capital development asin mababawasan an negatibong epekto kan krisis na dara kan presenteng pandemya.
Parte kan nasabing virtual event an pagtataong asistensya sa mga participating agencies para man sa One-Stop-Shop Pre-Employment Documentation asin Advisory Services.
Mantang pig-abisuhan man an mga interesadong magpartisipar na mag register sa link na makukua sa saindang official facebook page na DOLE-Bicol.
Tema kan pagcelebrar kan aldaw nin katalingkasan ngunyan na taon an, ‘Diwang Kalayaan sa Pagkakaisa at Paghilom ng Bayan.’