Gikatakdang pasakahan og kaso ang driver nga nag-overcharge ngadto sa iyang pasahero gikan Buhangin padulong Calinan ning syudad sa Davao.
Gibutyag ni Buhangin Police Station Commander Police Major Antonio Y. Luy nga niadtongg Abril 29, alas-9:00 sa gabii, gireklamo ang driver gumikan sobra kini kung makapangayo og plete.
Sumala pa nga una nang nagkasabot ang pasahero ug ang driver nga P1,500 ang pamasahe gikan sa may Buhangin duol sa airport padulong sa Calinan.
Apan gipangayuan pa kini og dugang plete sa dihang duna unta kini hapiton sa may Cabantian, didto na wala nagkasinabot ang duha nga hinungdan sa pagpangayo og tabang sa mobile patrol nga anaa sa lugar.
Sumala pa ni Luy nga nag-focus sila sa pugsanon o gitawag nga grave coercion batok sa driver diin sumala sa complainant, kung dili siya mutuman duna sumala pay mahitabo nga maoy hinungdan sa iyang kabalaka.
Samtang, nakig-coordinate na sa Buhangin Police Station ang Land Transportation Franchising and Regulatory Board (LTFRB) ug gisuta na ang liability sa operator bahin sa pag-violate sa franchising rules.