Patay ang driver sa motorsiklo human nga nadasok sa dumb truck kagahapon sa buntag sa Brgy. Tibungco, ning dakbayan sa Davao.
Sa imbestigasyon sa mga personahe sa Bunawan Police Station, sa wala pa natigayon ang panagbangga, gisubay sa motor ug truck ang Daang marlika highway nga naggikan sa managlahing direksiyon.
Naggikan ang motorsiklo nga gimaneho ni Raymund Ytaoc Quiamco, 31, sa south ug padulong kini sa Norte, samtang ang truck nga gimaneho ni Jay-ar Bermil Espinosa, 31, naggikan sa norte ug padulong kini sa south nga bahin.
Pag-abot sa lugar diin nahitabo ang insedente, mi-counter flow ang motorsiklo nga maoy hinungdan nga nabangga kini sa atubangang bahin sa dumb truck.
Daling gitabang sa 911 Paramedic Responder ang maong driver apan gideklara kining patay, samtang ang driver sa truck ang temporaryong gikustodiya sa Bunawan Police aron pasakahan og tukmang kaso.