Naguol ug nangayo og pasaylo ang driver sa v-hire nga nibuto ang ligid ug nalimbuwad sa Cebu-Cordova Link Expressway kun CCLEX niadtong pasado alas 2:00 sa hapon sa Sabado, Mayo 04, 2024 diin miresulta kini sa pagkakalas sa duha ka kinabuhi.
Si Christopher Tonacao, 34-anyos, taga Brgy. Tawason, Mandaue City, sa pakighinabi sa Brigada News FM Cebu, nangayo og pasaylo ngadto sa pamilya sa mga biktima ug nanghinaut siya nga mapasaylo ilabi na nga aduna pa siyay 4 ug 6-anyos nga mga anak nga nagpaabot kaniya ug bulag na sila sa iyahang pares.
Dugang pa niini, andam nga mo abaga sa mga galastohon ang iyahang amo.
Miangkon usab si Tonacao nga overloaded ang iyahang gimaneho sanglit 18 ra unta ang seating capacity niini walay labot sa driver apan miabot og 22 sanglit adunay 4 ka mga bata nga gipangsabak sa pipila niya ka mga pasahero.
Nasayran nga duha ka mga babaye ang namatay nga mga pasahero diin usa niini anaa na sa legal age apan usa niini ang dos-anyos pa.
Sa inisyal nga imbestigasyon sa Cordova Municipal Police Station sa pagpanguna ni Police Major Joffre Grande, nibuto ang luyo nga tuong ligid sa van nunot sa kusog niini nga dagan.
Posibleng mag-atubang og kasong Double Homicide ug Multiple Physical Injuries si Tonacao. | Alan Tangcawan