-Reymund D. Titong
KABANKALAN CITY, Negros Occidental, Philippines — Maga-sugod na ang pag-panagtag sang 900 ka mga food packs sa mga mangunguma sa 14 ka mga barangay nga lubos na apektuhan sang drought sa syudad sang Kabankalan.
Paga-pangunahan sang Department of Social Welfare and Development (DSWD)-Western Visayas kag lokal nga panguluhan sang syudad sa idalum sang administrasyon ni mayor Benjie Miranda, ang pagpanagtag sang mga food packs nga nag-abot gikan sa regional office sang ahensya, sang tinalikdan nga adlaw sang Martes, Abril 2.
Sa kada food pack ang may unod nga anum ka kilo nga bugas, 10 ka canned goods, 10 ka pakete sang powdered cereal mix, kag 10 man ka pakete sang kape.
Suno sa post sang City Government of Kabankalan, ang ini nga inisyatibo sang DSWD ang gin-desinyo para sa mga mangunguma, samtang nagapadayon ang nga naga-pusnga sang tuman ka init nga panahon sang adlaw sa pungsod.
Suno sa datus sang Provincial Agriculture Office, 17 sa 31 tanan nga mga syudad kag kabanwahanan, ang naka-experyensya sang drought bangud sang El Niño phenomenon.
Ang kahalitan nga gindala sang pagmala sang mga kaumhan ang nag lab-ot na sa P97.7 million sa bug-os probinsya, sa diin ang syudad sang Kabankalan ang lubos nga na-apektuhan nga naglab-ot na sa masobra P40 million nga gin-tuga nga kahalitan sa mga pananum nga humay.
Dugang pa diri, gin pa-butyag man ni United Sugar Producers Federations of the Philippines (UNIFED) president Manuel Lamata nga halos 100,000 na ka ektaryas sang katubohan sa probinsya ang na-apektuhan sang El Niño. Apang, may yara nga na-alukar nga P66 million pesos nga mitigating efforts ang Sugar Regulatory Administration (SRA) para sa industriya sang kalamay.
Na-apektuhan man sang drought ang mga local government units sang Cauayan, Valladolid, Hinigaran, San Enrique, Hinobaan, Moises Padilla, Isabela, Don Salvador Benedicto, Pulupandan, Bago, Sipalay, kag Himamaylan.*