Nadeskubrihan sa joint buybust operation ang usa ka drug den kungdiin 5 ka indibidwal ang nadakpan sa Violita St., Prk. Sampaloc, Brgy. Poblacion Uno, Bansalan, Davao del Sur pasado alas 3 ang takna kagahapon sa kadlawon.
Naila ang gipang aresto nga sila si Rexon Rey Balbutin alyas “Boss”, 46 anyos, ulitawo, residente sa Purok Sampaloc, Barangay Poblacion Uno, Bansalan, Davao del Sur; Dexter Gravador Alberca 39 anyos, ulitawo, pedicab driver, rersidente sa Purok 7, Barangay Colorado, Digos City; Dennis Tampipi Neri alyas “Petra”, 43 anyos, minyo, selfemployed, residente sa Purok 7, Barangay Colorado, Digos City; Rey Montojo Pabica alyas “Cali”, 49 anyos, minyo, habal-habal driver, residente Purok Santol, Barangay Kiagot, Digos City ug Shiela Mae Arellano Esposo alyas “Osang”, 22 anyos, dalaga, residente sa Purok 2, Barangay Baybay, Malalag, Davao del Sur.
Nakumpiska gikan kanila ang 7 ka pakete sa gitoohang shabu, 6 ka basyo sa pakete nga adunay lama sa gikatahapang shabu,
usa ka glass tooter, aluminum foil, usa ka ginamit na nga aluminum foil tooter, buybust money nga 1,000 pesos, 2 ka lighter, aluminum foil needle, 3 ka sudlanan sa eyeglasses ug usa ka mobile phone.
Ang gibanabana nga kantidad sa nakumpiska ug napalit nga gikatahapang shabu nagkantidad ug kapin kon kulang P115,000.00 nga adunay gibanabana nga gibug- aton nga 17 grams.
Nakatakdang mag atubang ang mga dinakpan og kasong paglapas sa Republic Act 9165 .