Nakatala og duha ka mga sunog ang Bureau of Fire Protection kagahapon sa buntag dinhi sa dakbayan sa Davao.
Unang miulbo ang kalayo sa usa ka factory sa play mats sa Purok 8 Upper Communal, Tibungco pasado alas- 8:00 sa buntag diin usa ka laborer ang na-trap sa sulod hinungdan nga nalakip kini sa pagkasunog.
Giila ang maong biktima nga si Jefre Devalucos, 19 anyos nga residente sa nasangpit nga lugar.
Gibana-banaan nga mukabat sa 2 Million pesos ang damyos sa nasangpit nga sunog.
Sa pikas bahin, human nga gideklarang fireout ang sunog sa Tibungko, laing sunog na usab ang nahitabo sa Purok Masea, Barangay Leon Garcia, ning syudad alas-9:23 sa buntag kagahapon, Disyembre 18, 2023.
Nagsugod ang maong kalayo sa panimalay ni Rodolfo Siman. Kapin kon kulang 11 ka mga panimalay ang damyos sa maong sunog. Wala hinooy casualty o nasamdan sa maong sunog sa Agdao.
Padayon pang gipanubayan sa BFP XI kung unsay tinubdan sa duha ka mga sunog sa syudad kagahapon sa buntag.