SELDA ang gihagsaan sa duha katao human sila nabisto nga dili tinuod ang gitaho nila sa mga pulis nga sila ang gitulis.
Giila ni Police Major Ivan Charles Abastillas, hepe sa Lagao Police Station ang mga dinakpan nga silang Alemar Pulbos ug Mario Masulit.
Ang mga nasangpit ang drayber ug helper sa panel nga iya sa usa ka food corporation sa Barangay Labangal.
Matud ni Abastillas, unang gisumbong sa duha nga gitulis sila sa nakamotor alas-8:30 sa gabii sa Purok 18, Barangay Lagao.
Nakuha sumala pa sa mga tulisan ang P72, 000 nga salapi nga iya sa kompanya.
Apan sa imbestigasyon, migula nga wala gitulis ang duha nakita ang salapi sa bulsa ug medyas sa usa sa dinakpan.
Apela ni Abastillas nga angayang mahimong rekisitos sa pagpangempleyo ang paglukat og police clearance aron malikayan ang samang insidente. Sa karon, kasong qualified theft ang gipasaka batok sa duha nga nagdumili na sa paghatag og pamahayag. I Richel Gubalani