Sa presuhan ro bagsak it suspek nga ginkilaea nga si Emelito Alapag, 34 anyos it Bakhaw Norte, Kalibo dahil sa pagnakaw sa sambilog ka opisina sa Brgy. Pusiw, Numancia, Aklan.
Base sa pahayag it Numancia MPS, nakita it biktimang si Joan Talislis nga buyot it persona ro anang pouch nga may sueod nga P500.00 ag cell phone nga nagabalor man sa P40, 000.00.
Matapos kara, insigada man nga nagpangayo man it bulig ro biktima sa mga kaeapit baeay rason nga nadakop si Alapag.
Narekober man sa ana ro kutsilyo nga gingamit sa pagbukas it pwertahan.
Base pa sa mga otoridad, dag-on 2018 ginpasakaan it kaso nga pagnanakaw si Alapag sa banwa it Kalibo.
Sa presente, sa kustodiya eun it mga otoridad ro persona ag nagahueat it kaso nga ipasaka kuntra sa ana./JIL B. LACSON