KORONADAL CITY — NASA 17 mga coronavirus disease ukon Covid-19 patients ang kasalukuyang ginagamot ngayon sa Covid Hospital ng South Cotabato na SOCCSKSARGEN General Hospital o SGH sa bayan ng Surallah.
Sa panayam ng Brigada News FM Koronadal kay Dr. Conrado Braña, Jr., chief of hospitals ng South Cotabato, kinumperma nito na sa nabanggit na bilang 16 ang nasa ward habang isa naman ang nasa ICU.
Tatlo lamang umano ang ICU ng nabanggit na ospital at sa ngayon, bakante ang dalawa nito.
Nilinaw din ni Braña na mula sa Koronadal ang karamihan sa mga pasyenteng ginagamot ngayon sa SGH.
Nagbabala naman ang opisyal sa posibilidad na kulangin ang mga equipment ng nabanggit na ospital sakaling magpapatuloy pa ang pagdami ng kaso ng Covid-19 sa lalawigan.
Dahil dito, patuloy ang apela ni Braña sa kumunidad na sumunod sa minimum health standard na pinatutupad kontra Covid-19.
