Nakahunong na sa lock-up-cell sang Sigma Municipal Police Station ang isa anay marine matapos gin-implementaran sang search warrant sang mga kapulisan sa iya puluy-an Brgy. Acbo, Sigma, Capiz.
Ginkilala ang suspetsado kay Jeazer Geronimo, 38-anyos, may live-in partner kag residente sang nasambit nga lugar.
Narekober sa iya paghinakop kag kontrol ang isa ka unit sang armas-luthang, 3 ka magazine, mga bala, tatlo ka M2O3 fragmentation grenade, 3 ka M2O3 empty shell sang .40 caliber fragmentation grenade, 2 ka M2O3 case kag army green pouch.
Magapangatubang ini sang kaso nga paglapas sa Republic Act 10591 ukon Comprehensive Firearms and Ammunition Regulation Act kag Republic Act 9516 ukon Illegal Possession of Explosives Act of 2008.
Ang search warrant ang gin-isyu kag ginpermahan ni Judge Judith Orendain-Tonogbanua, Regional Trial Coart, 6th Judicial Region, Mambusao, Capiz napetsahan Disyembre 5, 2023. Sa karon, ang mga nakumpiskar nga kagamitan ang yara sa kustodiya sang FESAGS division sang Sigma PNP para sa nagakaigo nga disposisyon. | Judy Ann Juare