Expanded Solo Parents Welfare Ordinance sa bayan ng Basud lusot na sa ikalawang pagbasa ng Sangguniang Bayan

CAMARINES NORTE- Lusot na sa ikalawang pagbasa ng Sangguniang Bayan ang Expanded Solo Parents Welfare Ordinance sa bayan ng Basud, Camarines Norte.

Ginawa ang pag apruba sa second reading bago pa man ang Semana Santa.

Sa ilalim ng ordinansa itinuturing na solo parent ang isang babaeng nanganak  na bunga ng panggagahasa at iba pang uri ng crime against chastity kahit wala pang final conviction sa offender basta ang ina ang nagtataguyod at nagpapalaki sa anak.

Solo parent din ang turing sa namatayan ng asawa at mag isang binubuhay ang anak, nakulong ang asawa at naiwan dito ang responsibilidad sa pagpapalaki ng bata, mag isang nagtataguyod sa bata dahil sa physical at mental incapacity ng asawa na sinertipikahan ng public medical petitioner.

Pasok din kategoryang solo parent ang magulang na mag isang nagpapalaki sa anak dahil sa legal separation, annulment at inabandona ng asawa, hindi kasal mapa ina o ama na piniling alagaan at buhayin ang anak kaysa ibigay ito sa institusyon, mag isang nagbibigay ng parental care at suporta sa bata gayundin ang kahit na sinong family member na siyang umako sa responsibilidad bilang head of the family dahil sa pagkamatay, abandonment, pagkawala o matagal ng pagkawala ng magulang ng bata.

Nagkaroon ng kaunting amyenda sa final draft ng ordinansa lalo na ang probisyon sa scholarship.

Sa halip na salitang “scholarship” ay pinalitan ito ng “educational assistance” dahil hindi umano kakayanin ng LGU ang gastusin sa pagpapa-aral ng isa sa mga anak ng solo parent.

Ang pondo na kakailanganin para sa implementasyon ng ordinansa ay kukunin sa Gender and Development fund ng munisipyo.

Nakapaloob din dito ang anti-discrimination at pagbibigay sa solo parent ng flexible work arrangement, parental leave, educational at housing benefits at medical assistance.