Gatusan ka pamilya nga mihikling tungod sa engkwentro sa Bukidnon, wala pa kabalik sa ilang puluy-anan

Gikompirma sa Police Regional Office 10 nga wala pa gipabalik sa ilang puluy-anan ang dul-an 400 ka pamilya gikan sa 4 ka sitio sa brgy. Cabadiangan, Kadingilan, Bukidnon homan sa nahitabo nga engkwentro tali sa kapolisan ug mga miyembro sa armadong grupo sa nakalabay nga adlaw.

Gibutyag ni PRO-10 Spokesperson Police Major Joan Navarro nga luyo nga stable na ang sitwasyon sa area kung asa nahitabo ang pagpang-harass sa armadong grupo, wala pa gipabalik ang mga residente tungod mihimo pa sa dugang aksyon ang otoridad aron masulbad ang gi-ingong boundary conflict tali sa duha ka lugar.

Gihimo ang maong lakang tungod gikabalak-an sa pwersa sa gobyerno nga basin og maduhig ang mga residente sa nahisgutan nga kasamok.

Sa karon, gihimo na ang koordinasyon sa nagkadaiyang government agencies didto sa Carmen, North Cotabato aron masiguro ang hingpit nga seguridad sa nahisgutang dapit.

Kahibaloan nga sa nahitabo nga harassment sa armadong grupo sa patrol base sa PNP, dunay usa nga nakabsan sa kinabuhe nga taga Carmen, Cotabato ug gituohan kini nga usa sa mga miyembro sa armadong grupo. -END-