GIPALAWMAN pa sa kapulisan sa South Cotabato ang ilang imbestigasyon kalabutan sa pagbusikad sa usa ka unit sa Yellow Bus Line nga gika-angol sa duha ka tricycle driver human nga na-angin sa maong isidente.
Kahibumdumang gikan sa Tacurong City ang bus ug pag-abot sa Koronadal City adunay mibusikad nga usa ka matang sa eksplosibo sa likod nga bahin sa bus.
Sa pakighinabi sa Brigada News FM Gensan kay PCapt. Renjon Bagaman ang spokesperson sa South Cotabato Provincial Police Office nga 6 lang ang pasahero sa bus ug pulos nakalingkod sa atubangan nga bahin.
Luwas matud pa ang mga sakay niini apan nahimong angol ang duha ka tricycle driver nga nakadungan sa bus.
Giila sa PNP ang samdan kang Wilfredo Ilagan Tino, driver nga tapad ang iyang gimanehuang trisikel sa mibusikad nga bus.
Sumala pa ni Bagaman nga ilang gitanaw nga motibo sa mga nagpaluyo sa pagpabusikad mao ang pagpangilkil o extortion sa maong kompanya.
Gibutyag niini nga dili ikalimod nga binuhatan kini sa mga rebeldeng grupo nga nagapangayo og revolutionary tax sa ilang kompanya apan gipaklaro niini nga ila pa nga i-verify ang maong impormasyon.
Samtang padayon ang pakig-alayon sa kapulisan ug kasundaluhan alang imbestigasyon kalabutan sa maong insidente. I MJ Fernandez