Pormal na nga nagpungko si Fire Inspector Delsie De Borja bilang Acting City Fire Marshall sang Bureau of Fire Protection (BFP) Roxas City.
Sa interview sang Brigada News FM kay FINSP De Borja, ginapahayag sini nga tumandok ini sa banwa sang Panitan, nagtapos sa kurso nga BS in Management kag nag-umpisa sa pinaka-manubo nga ranko tubtob nalab-ot ang officer rank.
Suno pa kay De Borja, antes ini na-assign sa siyudad sang Roxas nagserbe ini nga hepe sang President Roxas Fire Station sa sulod sang lima ka tuig kag naka-uyat sang mga position sa Regional Office kaangay sang Executive Assistant Head ni anay Regional Director Fire Chief Superintendent Candido kag nangin hepe sang plan and program division tubtob nga sang September 20, 2022 nangin Deputy Chief sang Roxas City Fire Station.
Gintuad pa sang opisyal, nga mas pagid iga-dedikar sini ang iya kaugalingon sa pagserbisyo sa mga pumuluyo sa tanan nga oras.
Mahibaluan, gintal-usan ni Fire Inspector Delsie De Borja bilang Acting City Fire Marshall si Fire Sr. Inspector Atty. Michael Lopez. | Ken Mark Gicalde