BICOL – DAWA bukas sa posibilidad na dikit dikit nang makakabalik sa normal an klase, mas tinutukan ngunyan kan Commission on Higher Education o CHED-Bicol an panghaluyan na implementasyon kan flexible learning.
Segun ki CHED Chairman Prospero De Vera, dai na mabalik sa dating tradisyonal na face-to-face classes an mga kolehiyo asin unibersidad dahil naging polisiya na kan komisyon na ipagpadagos an flexible learning sa maabot na school year asin sa mga masunod pang taon.
Siring man piglinaw , kaini na bako sana online classes an sakop kan flexible learning kundi pwede man ining maging kombinasyon kan face-to-face classes, modular asin online learning.
Mantang ipinahayag kan CHED-Bicol na an mga eskwelahan sa rehiyon an nag invest para sa siring na set up mantang an komisyon an nagtagama naman nin pondo para man sa training kan mga faculties.
Magigiromdoman na limang higher education institution sa rehiyon an tinugutan nang makapagsagibo nin limited face to face classes para sa saindang mga medical courses mantang igwang pino proseso na an aplikasyon para digdi.
Kun magiging matrayumpo sa medical courses asin mayong nangyaring ulakitan nin helang sa mga pag aadal pwediser nang irekomendar an limited face-to-face classes sa iba pang mga kurso na magiging parte kan “gradual re-opening.”