STRESS ang usa sa nakit-an nga hinungdan sa gikaingong gisudlan og dautang espiritu ang 12 ka mga estudyante sa Mangelen Integrated School sa Barangay Kamanga, Maasim, Sarangani Province adlawng Martes, Setyembre 27.
Kini segun ni Principal Imelda Dujeñas sa maong tulunghaan, nga mismo siya ang apil mitabang sa usa ka babayeng estudyante asa nasaksihan ang pag-usab sa tingog, nahimong kusgan ug misulirap ang mga mata.
Usa sa ginikanan nga na possessed ang anak ang napangutana sa hinungdan ug miingon nga stress ang hinungdan.
Anaa sa pito ka classroom sa managlahing grado ang gikaingong nasudlan og dautang espiritu niadtong higayuna asa ang uban human mahaplasan sa ilang tiyan ug giampoan, ang naulian ra gihapon.
Sa karon anaa na sa maayong kahimtang ang mga naasuyng estudyante ug nagpadayun ang klase dungan sa pahimangno sa mga magtutudlo nga kanunayng mag-ampo.
Sumala usab kang Father Julito Villarente, parish priest sa Our Lady of Peace and Good Voyage nga angayang sutaon ang hinungdan nganong nahitabo ug dili dayun ingnon nga na possessed sa dautang espiritu.
Sa gihapon ang pag-ampo ang maoy makabatok sa tanan nga susamang insidente.