GITANGGONG sa selda sa Criminal Investigation and Detection Group (CIDG) 12 ang lalaki nga gitudlong nanglugos sa iyang silingan. Si alyas Anthony, taga Polomolok, South Cotabato mihangyo nga itago ang pangalan ang nasikop sa pagsilbi sa warrant of arrest sa kasong lugos. Walay girekomenda nga pyansa ang korte alang sa temporaryong kagawasan ni alyas Anthony nga nasikop sa paglusad sa otoridad sa ‘Oplan Pagtugis’.
Si alyas Anthony, ang nasikop sa otoridad alas-3 sa hapon sa mismong adlaw sa Valentine’s day sa ilang panimalay sa Barangay Glamang. Samtang, nakabalaka si Police Lt.Col Ernor Melgarejo, Provincial chief sa CDIG-Sarangani tungod sa pagdaghan sa kaso sa lugos ug sexual abuse. Nakita usab niini sa mga kaso nga magkaila lang ang suspek ug biktima, dunay kaso nga miyembro sa pamilya ang suspek, duna usab silingan.
Ang lugos ang usa sa eight focus crime nga nakitaan sa Police Regional Office (PRO) 12 sa pagsaka sa ihap sa kaso. I Richel Gubalani