Gin-imbitar ni Governor Fredenil Castro sa isa ka sinapol ang mga empleyado kag departments heads sang nagkatuhay nga talatapan sang gobyerno probinsyal nga ginhiwat sa Hall of Governors, sa Kapitolyo probinsyal.
Dire ginpangayo sang gobernador ang kooperasyon sang tanan para sa pagpa- International Organization for Standardization (ISO) Certified sang probinsyal nga pagdumalahan nga sa karon ginahikot na.
Ginpahibalo dire ni Gov. Castro nga tinutuyo niya mangin ISO Certified ang gobyerno probinsyal bangud gusto sini makahatag sang maayo nga pangginobyerno sa pumuluyo.
Gindugang pa niya, nga ini ang isa ka priceless legacy nga mabilin para sa masunod nga henerasyon bangud magapadayon ini nga proseso kag benepisyo.
Suno pa sa gobernador, nga kon mahimo ma-accredit sang ISO nagakahulugan lamang nga ang operasyon sang probinsyal nga pagdumalahan ang international acceptable kag gapakita man nga nalab-ot ang ginatuyo nga serbisyo para sa tawo.
Kaangut sini, naghugyaw man ang mga tumalambong sa wala ginalauman nga bisita nga sanday Paolo Roxas nga anak ni anay Senador kag DILG Secretary Mar Roxas, 1st District Congressman Tawi Billones kag Uswag Ilonggo Party list representative, Cong. Jojo Ang Jr.
Sila ang nagpabutyag sang lubos nga pagpasalamat sa mainit nga pag-abiabi sa ila kag sa padayon nga pagsuporta. Yari man sa nasambit nga pulong ang mga Sangguniang Panlalawigan members nga ginapangunahan ni Vice Gov. Mitang Magbanua.