GISIGURO sa labaw sa kapulisan sa GenSan nga dili palabyon ang sakop nga malambigit sa hiwi nga binuhatan.
Matud ni PCOL. Gilberto Tuzon, director sa General Santos City Police Office (GSCPO) dihang nakaabot kaniya ang impormasyon kalabut sa pagkalambigit ni Police Staff Master Sergeant Bruce Buduan, nakadestino sa Pendatun Police Station, gilayon niyang gimanduan ang hepe sa presinto nga si PMajor Rommel Constantino nga taktakon sa pwesto si Buduan.
Gusto matud pa niyang masiguro nga walay hambong, abusado ug bastos nga sakop sa GSCPO.
Si Buduan nataktak na sa pwesto og naa sa personnel and accounting unit sa GSCPO.
Kahibaloan nga gireklamo si Buduan sa usa ka motorista human matud pa kini gipusil dungan sa gikaengong pag-overtake sa sibilyan sa sakyanan sa pulis.
Gihingusgan sa nag-reklamo nga dili tinuod nga nagpasalba lang si Buduan base sa napatik nga ‘blotter’ sa San Isidro Police Station asa gitahan sa pulis ang iyang armas. Samtang ang maong insidente ang gipa-imbestigahan na ni Tuzon ngadto sa iyang mga sakop.