KORONADAL CITY – MAHIGIT sa 6,000 na mga bakanteng trabaho ang naghihintay at maaaring aplayan ng mga job seekers sa May 1 Labor Day Job Fair ng Department of Labor and Employment o DOLE sa Soccsksargen region.
Ito ay lalahukan ng mga local at overseas employment agencies. Ayon kay DOLE 12 Information Officer Charles Bataga na kabilang sa pagdarausan ng Job Fair ang KCC Mall of Gensan Convention and Events Center; KCC Mall of Marbel Convention Center; Provincial Capitol Gymnasium sa Amas, Kidapawan City; at City of Tcaurong Gymnasium sa Sultan Kudarat.
Ilan sa mga job vacancies ay ang service crew, accounting staff, teller, baker, cashier, production worker, customer service representative, at marami pang iba. Upang mapataas ang tyansa na ma-hire, hinihikayat ni Bataga ang mga aplikante na magdala ng maraming application documents at magsuot ng presentableng kasuotan.
Maliban sa pagbibigay ng trabaho, may one-stop shop services din ang mahigit sa 10 na mga government agencies.
Samantala, umabot naman sa P 281.2 million na halaga ng cash assistance at livelihood grants ang nakatakdang ipamahagi ng DOLE 12 sa mahigit 47,000 na mga benepsiyaryo sa ilalim ng Tulong Panghanapbuhay sa Ating Disadvantaged Workers o TUPAD program at DOLE Integrated Livelihood Project o DILP na may layuning matulungan ang mga underemployed, displaced at disadvantaged workers.
May bubuksan ding mga Kadiwa ng Pangulo stalls kung saan makakabili ang mga mamamayan ng sariwa, dekalidad at murang mga produkto.
